సర్వధారి : జ్యేష్టం

వర్షం

తల్లాప్రగడ రామచంద్ర రావు గారిచే రచింపబడి శ్రీ మానాపగడ శాయి గారిచే స్వరపఱబడిన జానపదగీతం ఈ నెల మీకోసం.... ఈ పాటను వినడానికి ఈ క్రింద మీట నొక్కండి:

ఎవరికుంది తడవాలని ఈ వర్షంలో, ఉరుములలో పిడుగులమడిలో ఈ ఆరాటం తీరేనా!
విల్లులతో చల్లిన ముల్లుల జల్లులతో, ఈ కల్లల చల్లటి ఒడిలో నా ఆరాటం తీరేనా!

చక్కనియా చినుకులలో, చిందులనే తొక్కాలనె, చిరుకాంక్షే నామదిలో చిగురిస్తూ ఉదయిస్తే,
పెనుగాలీ ఉప్పెనలై, నను సాంతం మింగేస్తే, తడవాలని తపియించే నా ఉబలాటం తీరేనా!
ఎవరికుంది తడవాలని ఈ వర్షంలో, ఉరుములతో పిడుగులమడిలో ఈ ఆరాటం తీరేనా!

విరబూసిన సనజాజిని, తనచేతుల తాకాలనే, తొందరలో తుమ్మెదనై మోహిస్తూ దూకొస్తే,
భువిరాలిన బ్రమరంపై, నీ పాదపు బరువేస్తే, తగిలిననూ తాకాలనే నా ఆరాటం తీరేనా!
ఎవరికుంది తడవాలని ఈ వర్షంలో, ఉరుములతో పిడుగులమడిలో ఈ ఆరాటం తీరేనా!

మనసిచ్చిన మమకారం, నిను సైతం సహియిస్తూ, నినునిన్నుగ నిలువెల్లా ప్రేమిస్తూ పూజిస్తే,
నీ సమయం అరుదంటూ, నీ మొహమే చాటేస్తే, చెలములనీ చెలికానితో ఆ చెలగాటం తీరేనా!
ఎవరికుంది తడవాలని ఈ వర్షంలో, ఉరుములతో పిడుగులమడిలో ఈ ఆరాటం తీరేనా!

రావణుడే మంచోడై, రాముణ్ణే పూజిస్తూ, రామాయణం తానే వల్లిస్తూ రచియిస్తే,
ఖర్మ! రామచంద్రుడే, తన తనువే చాలిస్తే, శ్రీరాముడి అవతారపు ఆ పోరాటం తీరేనా!
ఎవరికుంది తడవాలని ఈ వర్షంలో, ఉరుములతో పిడుగులమడిలో ఈ ఆరాటం తీరేనా!
విల్లులతో చల్లిన ముల్లుల జల్లులతో, ఈ కల్లల చల్లటి ఒడిలో నా ఆరాటం తీరేనా!

ఎవరికుంది తడవాలని ఈ వర్షంలో!

శాయి మనాప్రగడ గారు, తన తండ్రి స్వర్గీయ నరసింహ మూర్తి గారి నుంచీ వారసత్వంగా సంగీత స్వర సంపదను పొందారు. రేడియో లోనూ దూరదర్శన్ లోనూ అనేక సార్లు పాడారు. రాష్ట్రపతీ భవన్ లో జాతీయ సమైక్యతా అవార్డును పొందారు. కె.వి. మహదేవన్, ఇళయరాజాలకు రంగస్థలం పై కీ బోర్డ్ సహకారం అందించారు. కొన్ని సినిమాలకి కూడా సంగీత సహకారం అందించారు. అనేక వాణిజ్య ప్రకటనలకు కూడా సంగీత సహకారం అందించారు.

మీ అభిప్రాయాలు, సలహాలు మాకెంతో అవసరం. దయచేసి మీ అభిప్రాయం ఈ క్రింది పెట్టెలో విస్తారంగా తెలపండి. వచ్చే సంచికలో ప్రచురిస్తాము. (Please leave your opinion)
పేరు(Name):
విద్యుల్లేఖ (Email):
అభిప్రాయం (Opinion):
	గమనిక: మీ విద్యుల్లేఖా చిరునామా ఎవరితోనూ పంచుకోము; అనవసర టపాలతో మిమ్మలను వేధించము. మీ అభిప్రాయాలను క్లుప్తంగానూ, సందర్భోచితంగానూ తెలుపవలసినది. (Note: Emails will not be shared to outsiders or used for any unsolicited purposes. Please keep comments relevant.)